Chiahpuam Pawisa man bel a ni

Vawiin khan Chiahpuam pawisa nia hriat, cheng nuai 50 man belh a ni a, mahse thil chhui lai mek a nih avangin Police-ten an manna hmun leh a hunte chipchiarin an sawi duh rih lo a ni. He pawisa hi vawiin tlai khan Aizawl Police Station thlenpui a ni a, chhiar fel nghal a ni. Puan tawh angin, Chiahpuam pawisa, hmun hrang hranga thuhruk hi man nual a ni tawh a, nimin lawkah pawh khan Kelsih-a mi huan mawng hnim karah cheng nuai 19, sing8 leh sang 8 man a lo ni tawh a, tunah hian cheng nuai 50 man a ni leh ta a ni.

Hetih lai hian vawiin khan Chiahpuam Collector Association te chuan Pu.Roliana Ukil, Pu Sam Joseph-a chu a pisaah hmuin Roliana-te him nan leh hlawk nan chauha ding lo turin an ngen. Chiahpuam Collector Association te hi Vanapa Hall kawtah inhmu khawmin an kal dan tur hrang hrangte an sawi ho hnuah. Bar Office-ah thu zawtfiah tura kal phawt ni se, chu mi hnuah thil awm dan a zirin hma lak ni se an ti a, BAR Association Office-ah hian kal nghalin chiahpuam chungchanga an upline-te Ukil rawihte chu an hmu a, he thilah hian anmahni, ukil-tehlawkna leh an Upline te him nan chauh chuan Court-ah hian dinsak lo tur leh, a ding tawhte pawh inhnukdawk turin an ngen a, Pu Roliana Ukil, Pu Sam Joseph chuan anmahni hlawk nan leh Roliana te sahim nan chauh a ding an nih loh thu leh Chiahpuam pawisa dahtu zawng zawngten an pawisa chu an lak let leh theih ngeina turin an ding zawk niin a lo hrilh a, Bar Association lama mite pawhin Mizo theuh nihna hre rengin, an buaina hi chin felsak ngei che u an duh tih sawiin, an pawisa dahte pawh an hmuh let lehna turin theihtawp an chhuah mek tih an lo hrilh bawk. Chiahpuam Collector-te chuan inbumna thil tam tak a awm nia hriain an mahni Ukil-ho zingah ngei pawh dik lo taka sum duh avanga hnathawk an awm nia an hriat thu pawh an sawi a, BAR Association hruaitute chuan chutiang mite chu tute nge an nih, chiang taka BAR Association hruaitute hnena thehlut turin an ngen a, chutiang titute chu an chungthu lo ngaihtuahsak an tiam a ni. He thilah hian Chiahpuam Collector-ten engemaw hriatthiam loh an neih deuh a vangin inhnialna pawh a chhuak a, mahse Pu. Roliana Ukil, Pu Sam Joseph a chuan Court-a a thu thehluhte chu Chiahpuam Collector hruaitute hnenah a copy pe in, lo zir chiang turin leh chumi hnuah hriat thiam loh leh lungawi lohna an nei a nih chuan a hnenah an lungawi lohna leh an duhte thlen turin a lo hrilh a,. theihtawpa hma lo laksak a tiam a ni. Chiahpuam collector hruaitute pawhin hetianga hma an lak laia anmahni zingah mahni hamthatna chauh ngaihtuaha Ukil lo ruai lo turin an ngen a ni.